NATURALEZA Y ENTORNU RURAL
Si prestosa ya interesante ye la ciudá, lo mesmo puede dicise del Conceyu, qu’añede a la vistosidá de la naturaleza la placidez de la vida rural.
L’entornu d’Uviéu guarda un atractivu tal que seduz a non pocos amantes de la naturaleza, l’arte y la cultura ya qu’ofrez al visitante paraxes naturales de gran belleza, cueves, arquitectura románica, palacios rurales, fontes dieciochesques, arqueoloxía industrial, pontes, molinos, alfares, asina como la siempre rica y vistosa arquitectura popular asturiana, coles sos caseríes, horros y paneres.
Pueblos guapos y aldees acoyedores onde disfrutar d’un entornu privilexáu y d’una xente amable que representa fielmente’l calter de los uvieínos.
Uviéu, que supo recuperar vieyes llinies férrees y senderos como una alternativa al ociu vinculáu al mediu ambiente, dispón d’una rede de siendes onde disfrutar del paséu y del deporte. Una amplia rede de parques y estayes verdes qu’arrodien la ciudá completen la ufierta d’espacios naturales. |
